Новости

Се известуваат граѓаните на Богданци дека утре – четврток (13.04.2023 година) и вторник (18.04.2023 година) во периодот од 08.00 до 12 часот ќе има прекин на водоснабдувањето за целото населено место поради зафати на новиот водоводен систем.

.

Здружението за развој, едукација и еколошка етика – ПОЛИМАТ 13 во рамки на проектот „Одржливо управување со електронски отпад – сервис за поправка и правилно одлагање на ОЕЕО во општините Богданци и Дојран“ објавува

Јавен повик

За ангажирање на 4 млади лица – 2 од општина Богданци и 2 од општина Дојран за следење на менторски обуки за професионално обучување за дијагностика и сервис на електронски уреди (телефони, таблети, компјутери и бела техника – мали апарати). Обуките ќе се одржат во периодот од мај 2023 до февруари 2024 година.

На лицата кои ќе бидат ангажирани ќе им биде ставена на располагање соодветна опрема за дијагностика и сервис на електронски уреди, во простории опремени за таа намена во соодветните општини.

Обуките ќе ги одржува искусно и професионално лице од областа на поправка на електронски уреди.

На волонтерите кои ќе бидат селектирани ќе им биде исплатен надоместок за основни трошоци за времетраење на обуката.По завршување на обуката ПОЛИМАТ 13 не презема одговорност за вработување на обучените кандидати.

Пријавувањето се врши на електронската адреса info.polymath13@gmail.comсо назнака „Пријава за јавен повик“. Заинтересираните кандидати треба да достават мотивациско писмо и кратка биографија најдоцна до 23 април 2023 година.

ПОЛИМАТ 13 ќе направи селекција на пријавените кандидати, водејќи грижа за еднаква родова, етничка и социјална застапеност. Кандидатите треба да ги исполнуваат следните критериуми:

• Завршено средно образование;
• Возраст од 18 – 30 години;
• Основни познавања на различни електронски уреди;
• Одговорно и посветено присуство на сите менторски сесии;
• Активно искористување на стекнатото знаење во локалната заедница.

Контакт лице за сите прашања кои ги имате во врска со повикот е Надица Маџирова, Проектен координатор, моб. 075/393-306.

Проектот „Одржливо управување со електронски отпад – сервис за поправка и правилно одлагање на ОЕЕО во општините Богданци и Дојран“ е финансиран од Програмата за мали грантови на Глобалниот еколошки фонд (ГЕФ ПМГ), а го спроведува Здружението за развој, едукација и еколошка етика – ПОЛИМАТ 13, во партнерство со Општина Богданци и Општина Дојран.

Денес, 06.04.2023 година, во просториите на општина Богданци, се потпиша Меморандум за соработка помеѓу Општина Богданци и Мрежа за рурален развој на Северна Македонија со партнерот ЛАГ Бојмија и партнерите во проектот, ТУРАН Иван ДООЕЛ увоз-извоз Богданци, НЕОКОМ АД Скопје, Риве Шпед ДООЕЛ Богданци, ЗГ „Центар за животна средина и одржлив развој“и ЈП „Комунална чистота“ – Богданци за реализација на проектна иницијатива на територијата на ЛАГ Бојмија.

Меморандумот ги објаснува главните насоки за идна соработка помеѓу партнерите во спроведување на проектната иницијатива „Намалување на негативното влијание врз животната средина преку изградба на крак од фекална канализација во индустриска зона м.в. „Барта“ во Богданци“поддржана од проектот „Програма за развој на заедницата“, финансиран од Агенцијата на САД за меѓународен развој – УСАИД, а имплементиран од страна на Мрежата за рурален развој на Северна Македонија.

Финансиските средства за реализација на проектната активност се обезбедени со кофинансирање на трошоците од страна на Агенцијата на САД за меѓународен развој – УСАИД –  „Програма за развој на заедницата“, општина Богданци и другите партнерите во проектот,ТУРАН Иван ДООЕЛ увоз-извоз Богданци, НЕОКОМ АД Скопје, Риве Шпед ДООЕЛ Богданци, ЗГ „Центар за животна средина и одржлив развој“,и ЈП „Комунална чистота“.

Овој меморандум претставува темел за понатамошна соработка помеѓу засегнатите страни, која ќе се развива врз основа на меѓусебно разбирање, доверба и координација за да се обезбеди што поквалитетна услуга на сите засегнати страни од областа на развој на заедницата.

Соработката има за цел изградба на крак од фекална канализација во индустриската зона Барта со што ќе се подобри управувањето со отпадни води во индустриската зона преку соработка на локалната заедница, кое од друга страна ќе овозможи подобри услови за живот на локалното население.

Се известуваат граѓаните на Богданци дека деновиве правното лице „Конструктор“ Скопје ќе  започне со градежни активности со цел имплементација на проектот „Реконструкција на системот за водоснабдување во Богданци“.

Станува збор за договор вреден 250 милиони и 228 илјади денари или околу 4 милиони и 68 илјади евра склучен помеѓу Министерството за животна средина и просторно планирање и изведувачот „Конструктор“,  со кој во наредните три години треба целосно да се реконструира дистрибутивната водоводна мрежа во Богданци.

Со реконструкцијата ќе бидат опфатени сите 179 крака од водоснабдителната дистрибутивна мрежа во Богданци со реконструкција на постоечките шахти, хидранти. Паралелно ќе се изврши и замена на околу 2157 приклучоци-водомери со инсталација на нови, за далечинско отчитување на потрошената вода. Сето ова може да предизвика прекин на водоснабдувањето во деловите каде ќе се извршуваат овие активности, за што ги замолуваме граѓаните да наидат на разбирање.

Активностите ќе започнат од „Резервоарот“ во Богданци, дел од улица „Осоговски“, дел од улица „Дојранска“ и „Мирче Ацев“ до улица „Маршал Тито“.

За секоја наредна делница, пред да се започне со градежни активности со цел реалицација на овој проект, граѓаните ќе бидат дополнително известени.

ВЕ ИЗВЕСТУВАМЕ ДЕКА ВО БОГДАНЦИ, ПОЧНУВАЈЌИ ОД ПОНЕДЕЛНИК (03.04.2023г.), МИНИСТЕРСТВОТО ЗА ЗДРАВСТВО, УНФПА, МАГО И МАКЕДОНСКОТО ЛЕКАРСКО ДРУШТВО ВО СОРАБОТКА НА ЦРВЕН КРСТ НА РСМ, ВО БОГДАНЦИ, ЌЕ СПРОВЕДУВААТ БЕСПЛАТНИ ГИНЕКОЛОШКИ ПРЕГЛЕДИ, ВКЛУЧУВАЈЌИ И ПАП ТЕСТ. МОБИЛНАТА АМБУЛАНТА ЌЕ БИДЕ ЛОЦИРАНА ВО ЦЕНТАРОТ НА БОГДАНЦИ (ВО ГОРНИОТ ПАРК). ПРЕГЛЕДИТЕ ЌЕ БИДАТ СО ЗАКАЖУВАЊЕ. СИТЕ ЗАИНТЕРЕСИРАНИ ТРЕБА ДА СЕ ЈАВАТ ВО ОПШТИНАТА НА ТЕЛЕФОН 034/222-333 ИЛИ ДА ДОЈДАТ ЛИЧНО (КАЈ ВАНГЕЛИЦА) ДА ИМ СЕ ЗАКАЖЕ ТЕРМИН. ПРЕГЛЕДИТЕ ЌЕ СЕ ИЗВРШУВААТ СЕ ДОДЕКА ИМА ЗАИНТЕРЕСИРАНИ ЛИЦА.

НЕ ОДЛОЖУВАЈТЕ. ПРЕГЛЕДАЈ СЕ. ЗАШТИТИ СЕ.

На 21 март 2023 година, во Дојран, градоначалникот на општина Богданци г-ин Блаже Шапов оствари средба со дипломатските претставници на резидентните и нерезидентните Амбасади во РСМакедонија, во рамки на Дипломатски економски караван – ДЕК низ дел од општините во Југоисточниот плански регион, организиран под покровителство на Министерството за надворешни работи, а во соработка со Бирото за регионален развој и Центарот за развој на Југоисточниот плански регион.

Целта на настанот беше сите десет општини и дел од компаниите од Југоисточниот регион да ги претстават своите потенцијали и можности за инвестирање пред претставници на повеќе од  20 – тина дипломатски претставништва во земјава.

На средбата во Дојран, општина Богданци ги презентираше  економските капацитети и можности за финансирање на проекти за подобрување на инфраструктурните услови во посоечките индустриски зони.

Покрај општината, свои презентации од различен аспект, а заради ограничениот број на учесници согласно протоколот,  имаа три компании од општина Богданци-Баџо, Бреботекс и Органик Нар.

Тим на СОС Детско село од Скопје во работна посета на југот каде постави свои штандови за поддршка за згрижувачки семејства во Македонија кои ќе го отворат својот дом за грижа на деца без родители.

Иако на празничен ден, посветениот тим на СОС Детско село од Скопје вчера беше во работна посета на југот, во општините Дојран и Богданци каде постави свои штандови за поддршка за згрижувачки семејства во Македонија кои ќе го отворат својот дом за грижа на деца без родители.

Празнично и работно тие се среќаваа со граѓаните од локалните средини со цел да им испорачат честитка насловена како „Прегратка за рамноправност!“ и виолетови ружи и лалиња, цветови со меѓународната боја на рамноправноста.

Во Македонија оваа хумана згрижувачка мисија на деца без родители прифатиле да ја обавуваат 286 жени, а само 77 мажи. Тоа значи дека од вкупниот број на 363 активни згрижувачи во Македонија 73% се жени, а само 21% машки згрижувачи, што е статистика која ги отсликува половите стереотипи во однос на тоа дека грижата за децата е обврска на жените.

Тимот на СОС „Детско село“ преку штандот „Стани згрижувач“ во 8-мо Мартовскиот празничен ден ги повикаа граѓаните на Богданци и Дојран кои имаат желба и услови да станат згрижувачи на деца без родителска грижа да се приклучат на оваа хумана визија обезедувајќи топол дом на децата кои сега го немаат тоа.

Да се стане згрижувач значи да се стане подобра верзија од себе, отварајќи го срцето и домот за дете на кое му е неопходна родителска грижа, зошто секое дете без родители заслужува да живее со лица кои ќе сакаат да пружат родителска грижа, зошто во семејство поубаво, похумано и пољубено се расте.

Сите заинтересирани да се вклучат во оваа хумана мисија за повеќе информации за згрижувачките семејства можат да ја посетат страницата https//zgrizuvanje.mk или Fb.com/zgrizuvanje.mk или да се обратат за повеќе информации на телефонскиот број 075/277-447.